Kinesiski miðbankastjórin Zhou Xiaochuan hevur boðað frá, at kinesiski miðbankin eftir ætlan heldur fram við at keypa evropisk lánsbrøv, fyri á henda hátt at stabilisera størsta útflutningsmakrnaðin hjá Kina, nevniliga evropeiska marknaðin. Á henda hátt sýnur kinesiski miðbankin eisini álit á evropisku búskapirnar og evru-gjaldoyrað sum heild. Miðbankastjórin tók orðini upp aftur hjá forsætisráðharranum Wen Jiabaor á eini ráðstevnu í Beijing: Kina ynskir at vera meira við í arbeiðnum, ið verður gjørt fyri at loysa fíggjarligu trupulleikarnar í ES. Gjaldskreppan í evropisku búskapunum tálmar í løtuni eftirspurninginum eftir kineskiskum útflutningsvørum.
Kinesiski forsætisráðharrin kom við ábendingum um, at Kina møguliga fer at stuðla IMF og ES, hetta fyri at lætta um fíggjarligu trupulleikarnar hjá limalondunum. Herman Van Rompuy, ES-forseti, ið eisini luttók á ráðstevnuni svaraði, at stjórnarleiðararnir í Evropa virðismeta kinesiska álitið og vilja taka øll tey neyðugu stigini, ið skullu til fyri at varðveita evro-gjaldoyrað og fíggjarliga støðufestið í Europa. Evropa hevur fyrr heitt á Kina um at keypa evropisk lánsbrøv, men Kina hevur fleiri ferðir gjørt vart við lága álitið á ES orsakað av gjaldskreppuni. Kinesiski forsætismálaráðharrin og aðrir kinesiskir embætismenn, ið starvast hjá IMF, hava tó greitt frá, at ein búskaparlig afturgongd í Evropa møguliga hevði minkað kinesiska búskaparvøksturin niður í eina helvt. Seinastu tølini vísa sostatt, at Kina hevur lækkað lánsbrævagoymsluna av amerikanskum lánsbrøvum til lægstu mongdina síðani junimánað 2010. Hetta møguliga fyri at koma Evropa til hjálpar við at keypa evropisk lánsbrøv ístaðin.
Metingarstovnurin Moody’s hevur nýliga boðað frá, at kredit-ratingin hjá 17 altjóða- og 114 evropiskum fíggjarstovnum møguliga verður lækkað orsakað av økta váðanum, ið stendst av evropisku gjaldskreppuni. Millum annað ætlar Moody’s at lækka ratingina hjá Grikkalandi til tað lægsta stigið. Sambært Moody’s verður kredit-ratingin hjá umleið 17 fíggjarstovnum møguliga lækkað heili trý stig (millum annað UBS og Credit Suisse), og harafturat verður ratingin hjá millum annað BNP Paribas og Deutsche Bank helst lækkað tvey stig orsakað av minkaða kreditvirðinum, ið kemur av gjaldskreppuni. Tað at bankar í Evropa eiga lánsbrøv hjá limalondunum Grikkalandi, Portugal, Írlandi, Spania og Italia, hevur elvt til eina ónda ringrás, metur Moody’s. Minkandi virðið á lánsbrøvunum ger tað torførari hjá bankunum at læna pening út, og tað førur minni búskaparligt virksemi við sær. Hetta ger tað uppaftur torførari at halda búskaparvøkstrinum uppi, og vøkstur er alneyðugur, um limalondini skullu kunna betra um ringu fíggjarligu umstøðurnar, sigur Moody’s.
Kinesiski miðbankin hækkaði fyri stuttum markið fyri hvussu høgt virðið á kinesiska gjaldoyranum er loyvt at vera. Kinesiski miðbankin nýtur annars peningapolitik, ið forðar gjaldoyranum at hækka ov nógv í virðið, soleiðis at kinesiska kappingarførið ikki minkar. Seinastu tølini vísa, at gjaldoyrað júst er økt 0,09 prosent í virði, og hetta er sostatt hægsta virðisøkingin í tríggjar vikur, eftir at markið varð hækkað. Tað hækkaða markið fyri gjaldoyravirðið vísur at Kinesiski miðbankin hevur góðar vónir um framtíðina, hóast búskaparvøksturin í løtuni er heldur slakur, sigur stjórin í Success Futures & Foreign exchange í Hong Kong. Harafturat fer evropiski miðbankin møguliga at læna umleið 470 milliardir evrur til tey fíggjarliga illa støddu limalondini.Hetta kann føra til størri kapital tilgongd í Asia umframt at eftirspurningurin eftir kinesiskum vørum økist.
Keldur: BBC, Bloomberg, Reuters.
|
landsbankin.fo | VTal: 382809