James Bullard, stjórin í amerikanska miðbankanum í St. Louis, metir peningapolitikk vera munabetri enn fíggjarpolitikk, tá umræður at tálma stoytir á búskapin. Hóast renturnar leingi hava ligið tætt við null, hevur peningapolitikkurin roynst væl, og tað er ikki neyðugt við fíggjarpolitiskum tiltøkum, segði hann fyri stuttum á eini búskaparráðstevnu.
Amerikanski tjóðbankin lækkaði renturnar til nærum null fyri meir enn trimum árum síðani og hevur harafturat keypt lánsbrøv fyri umleið 2.300 milliardir dollarar til tess at stimbra búskaparvøksturin. Hóast tekin eru um framgongd í amerikanska búskapinum, metir tjóðbankin, at búskaparvøksturin verður lágur og arbeiðsloysið høgt í 2012. Í januar væntast tjóðbankin at kunngera, at rentan framhaldandi fer at liggja um null fram til 2014. Síðani tjóðbankin av fyrstan tíð lækkaði rentuna, hava fleiri sambært James Bullard ivast í, um fíggjarpolitikkur ikki hevði verið eitt betri amboð at nýtt, tá javnvág aftur skal fáast í amerikanska búskapin, eftir at harðir stoytir hava rakt. Tó metir hann, at stabiliserandi politikkur, sum skal virka við stuttum skotbrái, skal latast tjóðbankanum upp í hendur. Hinvegin skulu politikarar taka sær av fíggjarpolitikki, t.v.s. skatti og almennari nýtslu, ið kann stimbra búskapin uppá miðal-langt sigt.
Í desember 2011 vóru 200.000 fleiri fólk komin í arbeiði í USA. Hetta var meir enn væntað, og arbeiðsloysið lækkaði til 8,5%, ið er tað lægsta seinastu trý árini. Í 2011 vórðu umleið 1,6 milliónir fólk sett í starv í USA, sum er størsta árliga hækkingin síðani 2006. Flestu av teimum mongu nýggju størvunum vóru at finna í privata geiranum. Amerikanska arbeiðsloysið hevur verið umleið 9% í fleiri ár, og kom uppá heili 10,1% í oktober 2009. Men í desember 2011 fall arbeiðsloysið fjórða mánað á rað, og hesi tekin um framgongd hava tískil sátt iva um, hvørt tað er neyðugt hjá tjóðbankanum við fleiri peningapolitiskum átøkum fyri at stimbra amerikanska búskapin.
Hóast tey nýggju tølini frá amerikanska arbeiðsmarknaðinum eru jalig, er tað enn kreppan í Evropa, ið setir dám á fíggjarmarknaðir. Flestu av amerikansku partabrøvunum lækkaðu heldur enn at hækka, tá ið tey nýggju tølini um amerikanska arbeiðsmarknaðin vóru kunngjørd, orsaka av ringu útlitunum í Evropa. Jaliga gongdin á arbeiðsmarknaðinum í USA samanborið við truplu støðuna í Evropa, ger harafturat, at virðið á amerikanska dollaranum hækkar í mun til evruna. Stjórin í miðbankanum í New York, William Dudley, metir at amerikanski tjóðbankin enn hevur ætlanir um at keypa fleiri lánsbrøv, hetta fyri at stimbra búskapin eftirsum búskaparvøksturin er sera lágur, og arbeiðsloysið enn er sera høgt. Tað eru enn umleið 23,7 milliónir amerikanarar, ið leita sær eftir arbeiði ella arbeiða niðursetta tíð, og ynskja at fáa eitt fulltíðarstarv. Fyri hvørt nýtt starv, sum í løtuni er tøkt at søkja, eru umleið 4,3 fólk arbeiðsleys. Um arbeiðsloysið minkar við somu ferð sum í desember 2011, fer tað at taka meir enn tvey ár, áðrenn arbeiðsloysið kemur niður á tað støðið, ið var áðrenn fíggjarkreppan byrjaði.
landsbankin.fo | VTal: 382809