Fyri trimum mánaðum síðani fundaðist Barack Obama við hinar G-20 stjórnarleiðararnar um fíggjarligar og handilsligar ójavnar í heimsbúskapinum, umframt gjaldoyrastríð. Sambært stjóranum í IMF eru tekin um stóra tilgongd av fremmandum kapitali, trýst á gjaldoyru og vaksandi gjaldoyragoymslum, ójavnar ið eisini vóru sjónligir undan altjóða fíggjarkreppuni. Stjórin í IMF mælti tískil til, at hesir trupulleikar skuldu viðgerast á G-20 fundinum í Paris 18-19 feb, so forðað verður fyri, at ein møgulig nýggj kreppa tekur seg upp.

Á G-20 fundinum samdust stjórnarleiðararnir um at hava størri eftirlit við altjóða búskaparligu ójavnunum. Eisini kom fram, at tað er torført fyri limalondini, bæði tey framkomnu og menningarlondini, at semjast um týdningarmiklar avgerðir fyri heimsbúskapin. Franski fíggjarmálaráðharrin helt, at londini mugu miða eftir at kanna ymsu sløgini av búskaparpolitikki, ið verður nýttur kring heimin í løtuni, og gera av um hann gagnar heimsbúskapinum sum heild, ella bert kemur tí einstaka landinum til góðar. 

Í hesum sambandi var gjaldoyrastríðið millum USA og Kina, umrøtt á fundinum. Kappingarførið hevur stóran týdning fyri hvussu tey ymsu londini koma fyri seg aftur eftir kreppuna, og tískil eru gjaldoyru eitt eymt punkt, nú ið handils yvir- og undirskotini byrja at vaksa í fleiri londum, eftir at heimshandilin hevur verið sera lágur undir kreppuni. Kina hevur stórt handilsyvirskot orsakað av góða kappingarførinum, ið millum annað kemur av lága gjaldoyranum, og samstundis hevur heimsins størsti búskapur, USA, stórt handilsundirskot. Kinesiska gjaldoyrað er munandi undirmett, segði amerikanski fíggjarmálaráðharrin Timothy Geithner á G-20  fundinum. Eingi týdningarmikil úrslit komu burturúr fundinum hasum viðvíkjandi. Harafturat var ikki tosað nógv um, hvørt Kinesiska gjaldoyrað skal leggjast afturat teimum gjaldoyrunum, ið longu eru í gjaldoyragoymsluni SDR hjá IMF, ella ikki. Um so er, at kinesiska gjaldoyrað skal uppí, er neyðugt at Kina ger tað lættari at veksla pening um til yuan kring heimin, og sambært IMF fer hetta helst ikki at henda í nærmastu framtíð, eftirsum tað inniber, at kinesiska gjaldoyrað tá kann hækka í virði.

IMF metur, at Kina fer at verða eitt av londunum við hægsta búskaparvøkstri í ár (umleið 9,6% í 2011). Harafturímóti væntast búskaparvøksturin í USA at verða 3% í ár, og umleið 1,5 % í Evropa. Hóast vit hava framgongd, er hetta ikki tann mest gagnliga framgongdin, segði stjórin í IMF í síni talu á G-20 fundinum. Heimsbúskapurin er í framgongd, men ímeðan menningarlondini hava høgan vøkstur og summi enntá tekin uppá ovurupphitan, hava tey framkomnu londini lágan vøkstur og høgt arbeiðsloysi. Stjórin í IMF skeyt í hesum sambandi nýggj tiltøk upp, ið skulu betra um fíggjargeiran kring heimin. Hetta skal fremjast við millum annað at leggja skattir á ymisk øki í fíggjargeiranum, men lítil undirtøka var fyri tiltøkunum á fundinum. 

Stjórnarleiðararnir samdust tó um, at stremba ímóti einum meira støðuføstum altjóða búskapi, millum annað við at hava strangari eftirlit við almennari skuld og fíggjarhalli. Eisini ynskist strangari eftirlit við skuld og uppsparing í privata geiranum, og betri eftirlit við ójavnum í heimshandlinum og altjóða íløgunum (viðv. tilgongd av fremmandum kapitali), við atliti til bæði gjaldoyra-, fíggjar- og peningapolitikki.     

Keldur: Bloomberg, IMF