Løgtingið samtykti í mai 2010, at hallið hjá landskassanum skal minka stigvíst frá 600 mió. kr. í 2011 til at verða burtur í 2015. Slík 5-ára fíggjarpolitisk ætlan er nýggj í føroyskum høpi, og um málið skal røkkast, verður óivað neyðugt við tiltøkum bæði á inntøku- og útreiðslusíðu landskassans.

Ábendingar eru um, at partur av hallinum á landskassaroknskapinum seinnu árini er bygnaðarligur, t.v.s. yvir longri áramál eru inntøkurnar minni enn útreiðslurnar. Við verandi lágkonjunkturi er hallið tískil bæði konjunkturelt og bygnaðarligt. Tílíkt bygnaðarligt ósamsvar millum inntøkur og útreiðslur krevur fíggjarpolitisk tiltøk.

Landsbankin hevur ment myndil, ið á einfaldan hátt lýsir, hvussu úrslitið og landskassaskuldin ávirkast, so hvørt bruttotjóðarúrtøkan, rentan, útreiðslur og landsskattatrýst broytast. Myndilin kann nýtast sum amboð, tá metast skal um støddina á fíggjarpolitiskum tiltøkum og hvussu hesi ávirka rakstrarúrslit og skuldarbyrðu landskassans. Ein tílíkur kravsmyndil lýsir sostatt tey fíggjarpolitisku krøv, ið skulu til fyri, at raksturin aftur javnvigar. Myndilin sigur tó ikki, hvørji einstøku tiltøkini skulu vera á ávikavist inntøku- og útreiðslusíðu landskassans.

Av tekniskum áðum (sirkulerar referansur) er umráðandi, at excel ikki er opið, tá myndilin verður opnaður, so syrg fyri at lata aðrar excel-fílur aftur innan myndilin verður latin upp. Heinta myndilin sum excel-fíla.

Heinta fortreytir og vegleiðing sum pdf-fíla.

Myndilin við vegleiðing og fortreytum er eisini at finna undir Útgávur