Í síni nýggjastu frágreiðing um Asiatiska búskapin ávarar IMF ímóti øktum prísvøkstri. Búskaparvøksturin í Asia fer sambært IMF at vera umleið 7 % í 2011 og 2012. Í 2010 var miðalvøksturin 8,3 %. Asia er komið skjótt fyri seg eftir kreppuna, men framgongdin hevur við sær at búskapir møguliga verða yvirupphitaðir í summum økjum í Asia, metur IMF.  

Hóast jarðskjálvtin í Japan voldi stóran skaða, eydnaðist tað japansku stjórnini at minka um avleiðingarnar, so ringa støðan í Japan møguliga ikki fer at breiða seg til aðrar asiatiskar búskapir, sigur IMF. IMF metur, at asiatiski búskaparvøksturin sum heild fer at verða burðardyggur og drivin av útflutningi og innlendis eftirspurningi, men vandi er fyri hægi inflatión. Vøruprísirnir eru øktir síðani oktobur 2010, og í Asia verður nú væntað, at prísirnir sum heild fara at liggja á eini hægru legu, sigur IMF. Harafturat ger IMF vart við stóra útlánsvøksturin og harav økta váðan í Asia. Samstundis eru húsaprísirnir øktir lutfalsliga skjótt í summum økjum í Asia, ið eisini er við til at økja um váðan. Í hesum sambandi metur IMF, at tað er neyðugt at føra ein táttan búskaparpolitikk, har ið konsolidering og virðisøking í ymsu gjaldoyrunum, eisini hevði hjálpt at tálma prísvøkstrinum. Harafturat væntast stóra kapitaltilgongdin til Asia at halda á fram í 2011 og 2012, orsakað av góða útlitinum fyri búskaparvøkstri. Ov stór kapitaltilgongd økir tó eisini um váðan og vandan fyri bløðrum  á asiatiska partabrævamarknaðum, sigur IMF.   

Sambært IMF hava høgu matvøru- og oljuprísirnir hækkað inflasjónina í Asia til 4,5 % í februarmánað í ár. Um høgi búskaparvøksturin heldur á ov leingi, hevur tað hægri inflasjón við sær og harvið kemur avlops-framleiðsla, ið til endan er skaðilig fyri búskapin og kann føra afturgongd við sær. Asiatiski menningarbankin ADB (Asian Development Bank) sigur, at hækkandi matvøru- og oljuprísirnir virka tálmandi á búskaparvøksturin, og metur at vøksturin møguliga fer at minka við 1,5% í ár, um prísirnir halda á at hækka. Sambært menningarbankanum, eru innlendis matvøruprísirnir øktir umleið 10% í miðal í nógvum asiatiskum londum í ár. Hóast Asia er í framgongd, hava øktu prísirnir ført við sær at livikostnaðurin er hækkaður, soleiðis at fleiri fólk í Asia eru vorðin fátøk. Sambært kanningum hjá menningarbankanum, verða umleið 64 milliónir fleiri fólk fátøk, um matvøruprísirnir hækka 10% afturat. 

Keldur: IMF, BBC