Ført hevur verið fram í føroysku fjølmiðlunum í seinastuni, at føroysk partabrøv á VMF á ICEX verða ávirkað av gongdini í íslendska búskapinum.

Hesum er landsbankin ikki samdur í.

Sera lítil samanhangur er millum íslendska búskapin og føroysk partabrøv serliga tí, at avtalan, ið er gjørd millum íslendska virðisbrævamarknaðin ICEX og partafelagið VMF er, at føroysku partabrøvini verða listaði í donskum krónum og ikki íslendskum krónum.

Viðvíkjandi einasta felagnum á marknaðinum í dag, Atlantic Petroleum, so hevur tað felagið og tann vinnan felagið virkar í, heldur ikki nakað við íslendska búskapin at gera. Harumframt eru flestu íleggarar í Atlantic Petroleum føroyingar.

Fjølmiðlar eiga at vísa varsemi, og kanna síni tíðindi væl, tá slík viðurskifti verða umrødd, tí teirra umrøða kann hava ávirkan á prísin.