Flestu framkomnu londini høvdu negativan vøkstur í 2009 (sí talvuna niðanfyri), men hetta sæst mest sum ikki aftur í komandi árinum. IMF hevur hækkað útlitini, og vøksturin í heimsbúskapinum er nú mettur til at verða 4,2% í ár og 4,3% í 2011. Tó vaksa búskapirnir við ymsari ferð kring heimin. Tey asiatisku menningarlondini fáa høgan vøkstur komandi árið, og IMF metur millum annað, at Afrika fer at koma skjótari fyri seg eftir hesi kreppuni, sammett við hvat tað hevur megnað í undanfarnum kreppum. Tey framkomnu londini fara at fáa lágan, men positivan vøkstur komandi árið og eru enn tengd at fíggjarligari stimbran. IMF heldur at tann amerikanski búskapin er betri fyri og fer at koma skjótari fyri seg eftir kreppuna enn t.d. Evropa og Japan. Í løtuni er vøksturin treytaður av politiskum tiltøkum og hjálparpakkunum, ið stimbra búskapin. Men ein spurningur er, nær privati eftirspurningurin hækkar, og fer at bera búskaparliga vøksturin, heldur búskaparfrøðingurin Olivier Blanchard hjá IMF.

Tey flestu framkomnu londini standa fyri stórum avbjóðingum í samband við at politisku tiltøkini, ið higartil hava stimbrað búskapin og styrkt fíggjargeiran, við tíðini noyðast at minka. Í hesum sambandi mælir IMF til umhugsni viðvíkjandi haldførinum á fíggjarpolitikkinum.

Fleiri lond eru noydd at gera ætlanir um at konsolidera almenna búskapin fyri at minka um almennu skuldina, og IMF metur, at flestu londini mugu fara undir konsolidering í 2011. Hóast IMF hevur hækkað útlitini fyri vøksturin í heimsbúskapinum, vísir IMF á, at ov stór almenn hall í nógvum londum kunnu órógva fíggjarmarknaðin og økja um váðan í fíggjargeiranum. Í hesum sambandi hevur IMF kunngjørt eina nýggja meting av støðuni í altjóða fíggjargeiranum. Metingin vísir, at fíggjarmarknaðir kring heimin eru komnir fyri seg síðani fíggjarkreppan byrjaði. Tað kemur av politiskum tiltøkum, ið hava styrkt fíggjargeiran og at búskaparliga støðan sum heild er betrað kring heimin. Partabræva- peningamarknaðir eru batnaðir. Men IMF heldur, at enn er neyðugt í flestu londunum at bøta um fíggjargeiran so vandin fyri fíggjarkreppum í framtíðini minkar, samstundis sum fíggjargeirin skal styrkjast og gerast meira effektivur. 

Í búskaparmetingini verður eisini mett, at brúkaraálitið er økt, og at príshækkingar ikki fara at taka dik á seg. Men høgt arbeiðsloysi og økt almenn skuld kunnu tálma framgongdini í flestu londum næstu árini. IMF heldur, at summi lond kunnu gera ábøtur á arbeiðsmarknaðin, umframt at gera skipanir við útbúgving o.a. til arbeiðsleys, sum eisini hevði minkað um vandan fyri langtíðararbeiðsloysi.  Harafturat er privata skuldin økt munandi í summum londum, og tað er við til at halda eftirspurninginum aftur. Av tí at búskaparliga framgongdin enn er veik, er neyðugt at halda á at stimbra búskapin. IMF mælir tí til at politisku tiltøkini, ið eru ætlað at verða framd í 2010, verða sett í verk heilt og fult.

Sostatt kemur heimsbúskapurin skjótari fyri seg eftir altjóða búskaparkreppuni, enn áður væntað, hóast hann enn er viðbrekin. Miðalvøksturin fyri ídnaðarlondini komandi árið væntast at verða umleið 2,3%, meðan miðalvøksturin í menningarlondunum verður yvir 6%. Asiatisku búskapirnir ganga á odda, t.d. er vøksturin í Kina mettur til at verða 10% í ár og vøksturin í India væntast at verða 8,8%. Harafturímóti er vøksturin í Evropa einans mettur til at verða 1% í 2010. IMF heldur, at ein haldgóður og burðardyggur vøkstur krevur stimbran av privata eftirspurninginum kring heimin, umframt at summi lond, t.d. Kina, tillaga virðið á gjaldoyranum, og at tey flestu framkomnu londini fara undir eina konsolidering av almennna búskapinum.   

Kelda: www.imf.org